Birləşmiş Millətlər Təşkilatı (BMT) çəyirtkələrin sürətlə yayılmağa davam etdiyi Şərqi Afrika ölkələri olan Keniya, Efiopiya və Somalidə 13 milyon nəfərin qida ehtiyatının təhlükədə olması barədə xəbərdarlıq edib.

BMT baş katibinin humanitar məsələlər üzrə müavini Mark Loukok məsələ ilə bağlı keçirilən mətbuat konfransında çəyirtkə istilasına qarşı təxirəsalınmaz tədbir görülmədiyi təqdirdə, Şərqi Afrika ölkələrinin fəlakətə məruz qalacağını və humanitar böhranla üzləşəcəyini bildirib.

O, həşəratlarla mübarizə planı üçün 76 milyon dollara ehtiyac olduğunu söyləyib.

Loukok iqlim dəyişikliyinin çəyirtkə sayının artmasında və onların sürətli yayılmasında təsirli olduğunu vurğulayıb.

Qeyd edək ki, bir kvadrat kilometrdə toplaşan 40-80 milyon çəyirtkə gün ərzində 35 min insanın qida ehtiyatını yemə potensialına malikdir.