Bir sıra hüquq müdafiəçiləri 2014-cü ilə qədər Azərbaycanda fəaliyyət göstərən və ölkədən getməli olan beynəlxalq təşkilatların, fondların geriyə qayıtması, burada fəaliyyət göstərməsinin vacib olduğunu bildirirlər. Bu fikirdə olanlar hesab edir ki, məsələn, Milli Demokratiya İnstitutu, Respublikaçılar İnstitutu kimi ABŞ təşkilatlarının, Almaniya fondlarının və digər Avropa təşkilatlarının Azərbaycanda fəaliyyətinin bərpası ölkəmizin xeyrinə olar. Ona görə də onların fəaliyyətinə şərait yaradılmalıdır.

Hakimiyyət düşərgəsinin bu məsələdə mövqeyinin necə olduğuna gəlincə, Yeni Azərbaycan Partiyasının deputatı Elman Nəsirov “Yeni Müsavat”a bildirdi ki, vaxtilə ABŞ-ın Milli Demokratiya İnstitutu, Respublikaçılar İnstitutu, eləcə də Almaniyanın bir çox fondları Azərbaycanda fəaliyyət göstərib və öncə “nə baş verdi ki, onların burada fəaliyyətinə son qoyuldu” sualının cavabını tapmaq lazımdır: “Bu sualın cavabı tapılanda görünəcək ki, həmin təşkilatların burada fəaliyyətinə son verilməsi haqlı olub Hesab edirəm bu, onunla bağlı idi ki, bir çox hallarda onlar müəyyən humanitar missiya adı altında Azərbaycanın daxili işlərinə qarışmaq, Azərbaycanda vətəndaş həmrəyliyinin pozulması istiqamətində addımlar atmaq, radikal müxalifət dairələri ilə ünsiyyətə girib ölkədə qarışıqlıq yaradıb vətəndaş itaətsizliyini təmin etmək və bu kimi qanunazidd hərəkətlər etdikləri haqqında təsdiqlənmiş məlumatlar olduğundan onların fəaliyyəti ölkəmizdə yekunlaşmış oldu. Bir çox hallarda biz onun şahidi oluruq ki, müxtəlif beynəlxalq QHT-lər özləri daha böyük qüvvələrin əlində alət olur, həmin qüvvələrin maliyyə dəstəyi ilə olduqları ölkələrdə iqtisadi və siyasi proseslərə təsir göstərirlər. Nəticə etibarilə ölkədə qarışıqlıq salmağa çalışır və bir çox hallarda inqilabi prosesləri istiqamətləndirirlər. Məsələn, həm Gürcüstanda, həm Ukraynada, həm Qırğızıstanda, həm də Ermənistanda baş vermiş inqilablarda “Soros” Fondunun adı çəkilib. Həmin ölkələrdə hakimiyyətə gəlmiş insanlara hətta ““Soros”un uşaqları" da deyirlər. Bu məntiqlə yanaşdıqda biz onun şahidi oluruq ki, belə təşkilatlar əslində fəaliyyət göstərdikləri ölkələrin daxili işlərinə qarışıb çaxnaşma yaratmaq məqsədi güdüblər. Bütün bu reallıqlar son nəticədə həmin o təşkilatların Azərbaycanda fəaliyyətinə xitam verilməsini şərtləndirib. Xüsusilə bugünkü dünyamızda biz nə qədər siyasi eybəcərliklərin baş verdiyinin şahidiyik, nə qədər qərəzli yanaşmaların şahidiyik".

E.Nəsirovun sözlərinə görə, bu reallıqlarda təbii ki, hər bir dövlət daha diqqətli olmalı və daha ehtiyatlı davranış tərzi nümayiş etdirməlidir. Azərbaycan dövləti də bütün bu reallıqları nəzərə alır və öz addımlarını atarkən bu məsələləri hesablayır: “Azərbaycan dövləti qeyd olunan reallıqlar fonunda təbii ki, çox diqqətli və ehtiyatlıdır. Təəssüf ki, vaxtilə Azərbaycanda fəaliyyət göstərmiş məlum təşkilatlar öz mənfi imicləri ilə yaddaşlarda qalıblar. Onlar son nəticədə öz davranışları ilə Azərbaycanda sabitlik, təhlükəsizlik mühiti yaranmasına deyil, sabitliyin pozulmasına rəvac verən davranışlar nümayiş etdiriblər. Bunun da nəticəsi bəllidir. Ona görə də hesab edirəm ki, bugünkü reallıqlar fonunda vaxtilə Azərbaycandan getmiş Milli Demokratiya İnstitutu, Respublikaçılar İnstitutu kimi təşkilatların geri qayıtması imkanı kifayət qədər məhduddur. Bununla belə, ”Heç vaxt “heç vaxt” demə" deyimi var. Mən də hesab edirəm ki, bu düzgün deyimdir".