Asif Ağayev Beyləqan Rayon İcra Hakimiyyətinə başçı vəzifəsinə təyin olunandan sonra ilk növbədə kadr dəyişikliklərinə başladı. Buna başqa adla “öz komandasını yaratmaq” deyirlər. Hərçənd, kadr siyasətini həyata keçirərkən başqalarının da məsləhətlərindən faydalanan Asif müəllim görünür, yeni formalaşdırdığı heyətin tərkibinə qatılan şəxslərin barəsində ictimai rəyi nəzərə almayıb.

Beyləqan Rayon İcra Hakimiyyətinin mətbu orqanı olan “Beyləqan” qəzetinin sabiq baş redaktoru , peşəkar jurnalist, sinədəftər şair, istedadlı yazıçı Elman İsrafiloğlunun nəinki doğma rayonda, eləcə də bütün respublikada, media cameəsində və ədəbi mühitdə nüfuzu hamıya bəllidir. Başçının ilk əmrlərindən biri ilə Elman müəllimin rayon qəzetinin rəhbəri görəvindən alınması Beyləqanın ziyalı ictimaiyyətində bir məyusluq doğurdusa, onun yerinə gətirilən şəxsin kimliyi bəlli olandan sonra daha böyük təəssüfə səbəb oldu. Çünki E.İsrafiloğlunun baş redaktor vəzifəsindən alınmasına yalnız bir şərtlə haqq qazandlırmaq olardı – Onun cavan və enrjili, perspektivli kadrla əvəz olunacağı təqdirdə. Yerinə gətirilən şəxs şair olmasa da olar, yazıçı olmasa da zərər yoxdur. Amma RİH-nin orqanı olan KİV-ə rəhbərlik edəcək şəxs mütləq peşəkar jurnalist olmalı, cəmiyyət tərəfindən birmənalı müsbət xarakterizə edilməlidir.

Söz yox, “Beyləqan” qəzetinin indiki baş redaktoru Mənzərə Məmmədova da cavandır. Həyat dolu, temperamentli xanımdır – Yay paltarına keçmək üçün heç yazın ortasını, havaların istiləşməsini də gözləməz. Təşkilati işlərə, ictimaiyyətlə təmasa o qədər çox baş aparandır ki, nəinki sələfi Elman İsrafiloğlu kimi kitab bağlamağa, hətta heç öz məqalələrini də yazmağa vaxtı yoxdur, başqasına yazdırır.

Mübarizdir – Xüsusilə də ictimai mənəviyyat əleyhinə olan cinayətlərə qarşı barışmazdır. Buna qədər rəhbərlik etdiyi “Realnews.az” saytı əxlaqsızlıq yuvalarına, qarşı mübarizə müstəvisində ad çıxarıb. Bəzən olub ki, hüquq-mühafizə orqanları saytın bu müstəvidə xidmətlərini qiymətləndirmək əvəzinə, əksinə, saytın əməkdaşlarının hərəkətlərinin səmimiliyinə inanmayıblar, onları səhvən şantajçı hesab ediblər. İndinin özündə də Beyləqanda M.Məmmədovaya inanmayanlar, başçının bu qərarına narazılıqla yanaşanlar çoxdur.

Mənzərə xanım bir az da sadəlövhdür, tez inanandır – Artıq özünə məhrəm bildiyi adamlara yayıb ki, Beyləqan RİH-nin başçısı onu Bakıda mənzillə təmin edəcəyinə söz verib. Görünür, sevincək olub. Axı onun heç saytının da oturaq mənzili – redaksiyası olmayıb. Həmişə paytaxtda, “3-cü mikrorayon dairəsi” həndəvərindəki iaşə obtyektlərindən birində qərargah qurub saytının əməkdaşları ilə birgə “priton”ları aşkarlamaq planları qururdu.

Nə deyirik, görünür, bəxt üzünə gülüb. Onu Asif Ağayevə tövsiyə edən şəxs yəqin çox xeyirxah adamdır. Ya hacıdır, ya da hacı kimi biridir. Bu mövzuda qələmə alacağımız növbəti məqalədə həmin şəxsin barəsində yazacağıq.

P.S. Beyləqan rayonunda kifayət qədər ali təhsilli, bacarıqlı gənclər var. Onlar hələ də işsizdilər, sevindirici hal olardı ki, yeni başçı gəncləri irəli çəkə, onların işlə təmin edilməsinə köməklik göstərə.

RealMedia.az