Ölkə başçısı İlham Əliyevlə Ermənistan Baş naziri Nikol Paşinyanın Münhen debatına damğa vuran məqamlardan biri də BMT TŞ-nın Dağlıq Qarabağla bağlı qəbul etdiyi 4 qətnamə oldu. BMT TŞ-nın 4 qətnaməsini xatırladan İlham Əliyevə cavab verən Nikol Paşinyan qətnamələrinin əsas məqsədinin atəşkəs elan edilməsi olduğunu bildirib və iddia edib ki, həmin sənədlərdə atəşkəsin Azərbaycan tərəfindən pozulduğu vurğulanıb. Paşinyanın fikrincə, BMT TŞ-nın qətnamələrinə əməl etməyən tərəf Azərbaycandır və atəşkəsi pozmasına baxmayaraq, Qarabağı da əlində saxlaya bilməyib. Üstəlik, guya, həmin sənədlərdə Ermənistan ordusundan yox, Dağlıq Qarabağ ermənilərinin yaratdığı yerli müdafiə dəstələrindən söhbət gedir.

Bəs, bu liderlərdən hansı haqlıdır? BMT TŞ-nın sözügedən qətnamələri nədən bəhs edir?

Ovqat.com-un araşdırmalarına görə, BMT TŞ Şurasının qətnamələrində Kəlbəcər, Ağdam, Zəngilan və digər işğal olunmuş ərazilərində, o cümlədən Horadiz şəhərində hərbi əməliyyatların dərhal dayandırılması tələb olunur və münaqişənin Azərbaycan-Ermənistan arasında baş verdiyi vurğulanır. Dağlıq Qarabağ erməniləri barədə isə heç bir fikir söylənilmir. Yalnız bir yerdə - 30 aprel 1993-cü il tarixli 822 saylı Qətnamədə “yerli erməni qüvvələrinin Kəlbəcər rayonuna soxulması”ndan bəhs olunur ki, bu da atəşin Azərbaycan tərəfindən yox, qarşı tərəfin günahı ucbatından pozulduğu anlamına gəlir.

Paşinyanın iddialarını yalanlayan 4 Qətnaməni olduğu kimi dərc edirik:



BMT Təhlükəsizlik Şurasının Dağlıq Qarabağ münaqişəsi üzrə Qətnamələri

BMT-nin Təhlükəsizlik Şurasının 30 aprel 1993-cü il 822 saylı Qətnaməsi



Təhlükəsizlik Şurası, Təhlükəsizlik Şurasının sədrinin 29 yanvar 1993-cü və 6 aprel 1993-cü il tarixli Dağlıq Qarabağ haqqında olan bəyanatlarına istinad edərək; Baş Katibin 15 aprel 1993-cü il tarixli məruzəsini nəzərə alaraq; Azərbaycan Respublikası və Ermənistan Respublikası əlaqələrinin pozulmasına görə öz ciddi narahatlığını bildirərək; hərbi silahlı əməliyyatların qızışdırmasını və o cümlədən yerli erməni qüvvələrinin Kəlbəcər rayonuna soxulması ilə əlaqədar narahatlığını qeyd edərək; bu vəziyyətin sülh və sabitliyə təhlükə yaranması, mülki əhalinin kütləvi yerdəyişməsi, regionda, o cümlədən Kəlbəcər rayonunda fövqəladə humanitar vəziyyətilə əlaqədar öz ciddi narahatlığını bildirərək; bu regionda olan bütün dövlətlərin ərazi bütövlüyünü, beynəlxalq sərhədlərin pozulmazlığını və ərazi əldə etmək üçün silahlı qüvvələrin istifadə etməyin yolverilməzliyini bir daha təsdiq edərək; ATƏT çərçivəsində keçirilən sülh danışıqlarını dəstəklədiyini bəyan edərək və hərbi əməliyyatların qızışdırılması, bunun ağır nəticələrə gətirib çıxaracağı ilə bağlı narahatlığını bildirərək:

1) Dayanaqlı atəşkəsin əldə olunması üçün bütün hərbi əməliyyatların və digər düşmənçilik aktlarının hökmən dayandırılmasını, işğalçı qüvvələrin Kəlbəcərdən və Azərbaycanın zəbt olunmuş rayonlarından çıxarılmasını tələb edir;

2) Maraqlı tərəfləri münaqişəni ATƏT-in Minsk qrupu prosesinin çərçivəsində sülh yolu ilə həll etmək üçün danışıqları bərpa etməyə və problemin sülh yolu ilə həll olunmasına qarşı hər hansı bir hərəkətə yol verməkdən çəkinməyə çağırır;

3) Bu regionda həmçinin münaqişənin toxunulduğu rayonlarda mülki əhalinin əzab-əziyyətlərinin azaldılması üçün aparılan humanitar yardımın göstərilməsinə əlaqədar olan beynəlxalq fəaliyyətin maneəsiz keçməsini təmin edilməsinə çağırır və tərəflərin Beynəlxalq Humanitar Hüququn prinsiplərinə və normalarına əməl olunmasının məcburiliyini təsdiq edir;

4) Baş Katibdən hazırda fəaliyyətdə olan ATƏT-in və Minsk qrupunun sədrlərinin məsləhəti ilə regionda və həmçinin Azərbaycanın Kəlbəcər rayonundakı vəziyyətin qiymətləndirilməsini və sonradan Şuraya məruzə edilməsini xahiş edir;

5) Bu məsələ ilə əlaqədar aktiv məşğul olmağı qərara alır.

Sərəncam 3205 saylı yığıncağında yekdilliklə qəbul olunmuşdur.