Müşfiq Tarıverdiyev,
Sumqayıt şəhərinin avtomobil bazarının müdiri

Tarixi Zəfərimizdən sonrakı mərhələ Azərbaycan dövlətinin və xalqının qarşısında yeni və şərəfli bir missiya müəyyənləşdirdi – işğaldan azad olunmuş torpaqların dirçəldilməsi, doğma yurdlarından didərgin düşmüş soydaşlarımızın mərhələli şəkildə öz ata-baba ocaqlarına qaytarılması. Bu gün artıq qürurla deyə bilirik ki, dağıdılmış şəhər və kəndlərimizin yerində müasir, abad və dayanıqlı yaşayış məkanları qurulur. Bərpa və quruculuq prosesi təkcə fiziki infrastrukturun yenilənməsi deyil, həm də milli ruhun dirçəlişi, 30 illik həsrətin sona çatmasının rəmzidir.

Azad olunmuş ərazilərdə həyata keçirilən genişmiqyaslı layihələr Azərbaycanın iqtisadi qüdrətinin və idarəçilik iradəsinin bariz nümunəsidir. Müasir yol infrastrukturu, sosial obyektlər, məktəblər, xəstəxanalar, inzibati binalar və yaşayış kompleksləri qısa müddət ərzində inşa olunur. Bu proses sübut edir ki, Azərbaycan xalqı təkcə mübariz və qalib xalq deyil, eyni zamanda qurucu və yaradıcı xalqdır. Dağıntıların yerini inkişaf, ümidsizliyin yerini inam əvəz edib.

44 günlük Vətən müharibəsində qazanılan möhtəşəm Qələbə və 2023-cü ildə həyata keçirilən lokal antiterror tədbirləri nəticəsində ölkəmizin ərazi bütövlüyü və suverenliyi tam bərpa olundu. İlham Əliyevin rəhbərliyi ilə rəşadətli Azərbaycan Ordusu tarixi ədaləti təmin etdi. Bu Zəfər illərlə davam edən danışıqların nəticəsiz qaldığı bir dövrdə xalqın iradəsinin və dövlətin qətiyyətinin təntənəsi oldu.

Fevralın 25-də Prezident İlham Əliyevin, birinci xanım Mehriban Əliyevanın və qızları Arzu Əliyevanın Xocalı və Xocavənd rayonlarına səfəri Böyük Qayıdış prosesinin növbəti mühüm mərhələsi kimi yadda qaldı. Səfər çərçivəsində görülən işlərlə yaxından tanışlıq, yeni inşa olunan obyektlərin açılışı və sakinlərlə səmimi görüşlər dövlətin öz vətəndaşına göstərdiyi diqqət və qayğının bariz ifadəsi idi.

Xocavənd şəhərinin Böyük Qayıdış proqramı çərçivəsində sakinlərinə qovuşan doqquzuncu şəhər olması xüsusi rəmzi məna daşıyır. Uzun illər məcburi köçkün həyatı yaşamış insanlar artıq öz doğma torpaqlarında yeni həyata başlayırlar. Prezidentin sakinlərlə görüşü zamanı səsləndirdiyi fikirlər hər bir azərbaycanlının qəlbindən keçən duyğuların ifadəsi idi: köçkünlük həyatının mənəvi və fiziki sınaqlarından şərəflə çıxan insanlar bu gün öz torpaqlarında qürurla yaşayırlar.

Dövlət başçısı çıxışında vurğuladı ki, xalqımız heç vaxt ümidini itirmədi. Hər kəs inanırdı ki, bir gün ədalət zəfər çalacaq, işğal altındakı torpaqlar azad olunacaq və doğma yurdlarımıza qayıdış baş tutacaq. Bu inam dövlət-xalq birliyinin təməlini möhkəmləndirdi və nəticədə tarixi ədalət bərpa edildi. Artıq ağır günlər geridə qalıb, qarşıda isə quruculuq və inkişaf mərhələsi dayanır.

Fevralın 26-da Xocalı şəhərində Xocalı Soyqırımı Memorialının açılışı isə xüsusi mənəvi məna kəsb etdi. Xocalıda ucaldılan bu memorial silinməz yaddaşımızın daşlaşmış ifadəsidir. Açılış mərasimində dövlət rəhbərliyi memorialla tanış oldu, rayon ictimaiyyətinin nümayəndələri ilə görüş keçirdi və bir daha bildirdi ki, Xocalı faciəsi heç vaxt unudulmamalıdır.

Görüş zamanı Xocalı həqiqətlərinin beynəlxalq ictimaiyyətə çatdırılması istiqamətində görülən işlər geniş şəkildə qeyd edildi. Uzun illər ərzində aparılan diplomatik fəaliyyət nəticəsində artıq 20-yə yaxın ölkə Xocalı soyqırımını tanıyıb. Bu, ədalətə aparan yolun mühüm mərhələlərindən biri idi. Lakin ən böyük ədalət xalqımızın öz gücü ilə əldə etdiyi Zəfər və cinayətkarların məhkəmə qarşısında cavab verməsi oldu.

Bakıda müharibə cinayətlərinə görə keçirilən məhkəmə prosesi tarixi ədalətin təntənəsi kimi dəyərləndirilir. Azərbaycan dövləti sübut etdi ki, o, həm döyüş meydanında qalib gəlməyə, həm də hüquqi müstəvidə haqqını qorumağa qadirdir. Ədalət başqalarının qərarları ilə deyil, xalqın iradəsi və dövlətin gücü ilə təmin edildi.

Tarixi Zəfərə gedən yol asan olmadı. Güclü iqtisadiyyatın qurulması, müasir ordunun formalaşdırılması, beynəlxalq əlaqələrin genişləndirilməsi illərlə aparılan məqsədyönlü siyasətin nəticəsi idi. Azərbaycan heç kimdən asılı olmayan, müstəqil qərarlar qəbul edən dövlətə çevrildi. Məhz bu güc sayəsində ərazi bütövlüyümüz bərpa olundu və suverenliyimiz tam təmin edildi.

Son illərdə bir sıra beynəlxalq təşkilatların qəbul etdiyi qərar və qətnamələr Azərbaycanın ədalətli mövqeyinin hüquqi əsaslarını daha da möhkəmləndirdi. Ermənistanın hərbi cinayətləri və işğal faktı dünya ictimaiyyətinə ardıcıl şəkildə çatdırıldı. Strateji tərəfdaşlıqlar və ikitərəfli münasibətlər ölkəmizin beynəlxalq nüfuzunu artırdı və haqq səsimizin daha geniş coğrafiyaya yayılmasına imkan yaratdı.

Bu gün azad olunmuş torpaqlarda ucaldılan hər bina, salınan hər yol və açılan hər məktəb Azərbaycan xalqının əyilməz ruhunun göstəricisidir. 1990-cı illərin çətinlikləri artıq geridə qalıb. Müasir Azərbaycan güclü, qətiyyətli və özünü müdafiə etməyə qadir dövlətdir. Sülh və sabitlik şəraitində davam edən quruculuq prosesi göstərir ki, Zəfər yalnız hərbi qələbə deyil, həm də gələcəyə inamın və milli birliyin möhtəşəm təntənəsidir.