Bu təhlükəli dini sekta Azərbaycanda yenidən fəallaşıb?

30-05-2020, 11:41 332 dəfə baxılıb

Son onilliklərdə bir sıra xarici dairələr demokratiya, tolerantlıq, multikulturalizm və s. kimi Qərb dəyərlərindən sui-istifadə etməklə müəyyən məqsədlərinə çatmağa çalışırlar. “İslam” adı altında gizlənən bir sıra dini cərəyanlardan əlavə, xristianlığın müxtəlif məzhəblərinə aid olduqlarını iddia edən, lakin əslində tamamilə başqa əqidəyə qulluq edən bir para gizli, açıq sektalar da torpaqlarının 20 faizi işğal altında olan Azərbaycanda düşmən güclərin alətinə çevrilir.
Koronavirus pandemiyasına baş qarışdığı bir məqamdan da yararlanan belə təşkilat və cərəyanlar fəallaşmağa başlayıb....



Dini Qurumlarla İş üzrə Dövlət Komitəsi tərəfindən 2002-ci ildə qeydiyyatdan keçirilmiş, lakin 2009-cu ildən sonra təkrar qeydiyyata alınmamış, buna rəğmən fəaliyyətinə qismən icazə verilmiş “Yehova Şahidləri” adlı qeyri-ənənəvi sekta da son vaxtlar fəallaşıb. Əvvəllər kitablar paylamaq, ərzaq və pul yardımları etməklə Azərbaycan vətəndaşlarını öz cərgələrinə cəlb etməyə çalışan bu cərəyanın təbliğatçıları başqa üsullara da əl atmağa başlayıblar. Sekta fəalları ixtiyarı bir şəhər telefon nömrəsinə zəng edərək müxtəlif həyati, ancaq çaşdırıcı suallar verməklə dini cəhətdən savadsız şəxslərdə maraq oyatmağa çalışırlar...

Belə telefon zənglərindən biri də Moderator.az əməkdaşının şəhər nömrəsinə gəlib. Rus dilində nəzakətlə salam verən xanım özünü “Günel” kimi təqdim edərək təxminən belə bir sual verib:
“Çoxları belə düşünür ki, biz daha çox yaşlaşdıqca ömrümüzün nə qədər qısa olduğunu daha çox dərk etməyə çalışırıq. Siz necə düşünürsüz?”.

Gərgin iş vaxtı olduğundan əməkdaşımız həmin xanıma yalnız “Deyə bilərsinizmi, haradan, hansı təşkilatdan zəng edirsiniz?” sualını verib. Cavabında isə “Yehova Şahidləri”nin Ümumdünya Təşkilatı” sözlərini eşidib...

Araşdırmalar göstərir ki, nəinki ənənəvi xristian dininə, eyni zamanda İslama qarşı da fəaliyyət göstərən “Yehova Şahidləri” Azərbaycanda da milli və dövlətçilik ənənələrini sarsıtmaq istiqamətində gizli işlər görür. Bu sektanın Vətənimiz üçün əsas təhlükəli tərəflərindən biri də odur ki, onun üzvlərinin hərbi xidmətdə silah götürməkdən, kiməsə atəş açmaqdan imtina etmək kimi prinsipləri var... Yəni sabah Qarabağ uğrunda savaş başlasa, “Yehova Şahidləri”nin üzvü olan minlərlə Azərbaycan vətəndaşı işğalçı ermənilərə atəş açmaqdan imtina edə bilər...



Eyni zamanda bir çox digər təşkilatlar (məsələn, cinsi azlıqlarla bağlı olanlar) kimi “Yehova Şahidləri” də Qərbin bəzi dairələri üçün hibrid müharibə alətidir. Məhz bu səbəbdən bir sıra ölkələrdə, o cümlədən şişam qonşumuz Rusiyada bu sektanın fəaliyyətinə qadağa qoyulub.
ABŞ və Avropanın insan haqları adı altında fəaliyyət göstərən bir sıra qurumları mütəmadi olaraq Azərbaycan hökumətinə “Yehova Şahidləri” kimi sektalara daha çox sərbəstlik verilməsi üçün təzyiqlər göstərirlər.

Xatırladaq ki, 2016-cı ildə Moderator.az-a geniş müsahibəsində Dini Qurumlarla İş üzrə Dövlət Komitəsinin sədr müavini Səyavuş Heydərov "Yehova Şahidləri" sektasının ölkəmizdəki fəaliyyəti haqda da ətraflı məlumat vermişdik.

İş günü olmadığı üçün Dini Komitə əlaqə yaradıb bəhs edilən dini sektanın son dövrdəki fəaliyyəti ilə bağlı məlumat ala bilmədik. Güman edirik ki, bu və digər əlaqədar dövlət qurumları məsələ ilə ciddi məşğul olacaqlar.

Mövzu ilə bağlı araşdırmalarımızı davam etdirməyə çalışacağıq.


loading...
OXŞAR XƏBƏRLƏR
XƏBƏR LENTİ
BÜTÜN XƏBƏRLƏR