"Bakı Metropoliteni"nin rəisi Zaur Hüseynovun Londonda yaşayan oğlu Həbib Hüseynzadə İngiltərədə böyük həcmdə investisiya müqaviləsi bağlayıb.

"Azerinfo.tv " xəbər verir ki, bu barədə jurnalist Cavanşir Həsənli özünün Facebook hesabında məlumat yayıb.


Jurnalist C.Həsənli yazır: "Maliyyə nazirliyinin açıqlamasına görə, pandemiyadan ziyan çəkən dövlət şirkətlərinə maliyyə dəstəyi çərçivəsində “Bakı Metropoliteni”nə 2 mln. 600 min manat ilkin maliyyə dəstəyi göstərilib. Metro işləmir, bəs pullar hara gedir? Aşağıdakı sənədlər bu sualın cavabıdır. “Bakı Metropoliteni”nin rəisi Zaur Hüseynovun Londonda yaşayan 28 yaşlı oğlu Həbib Hüseynzadə ötən ay İngiltərədə böyük həcmdə yeni investisiya müqaviləsi imzalayıb. İyunun 29-da bununla bağlı razılaşma əldə olunub, iyulun 21-də müqavilənin tələblərinə uyğun olaraq ödəmə Britaniyanın Barclay's Bank UK PLC bankı vasitəsilə icra olunub. 41 səhifəlik müqavilənin şərtləri əsasında vəsaitin həcmi və hansı məqsədlə köçürülməsinin detalları məxfi saxlanılır".




Metropoliten rəisinin oğlu tikinti və daşınmaz əmlak biznesi ilə məşğul olur, indiyədək Callington yaxınlığında Downgate-də böyük ərazini satın alaraq, çoxsaylı evlər tikib, satışa çıxarıb.

Z.Hüseynov 27 fevral 2014-cü il tarixli 290 saylı Sərəncamı ilə “Bakı Metropoliteni” Qapalı Səhmdar Cəmiyyətinin sədri vəzifəsinə təyin edilib. Oğlu Həbib Hüseynzadə "PINNACLE WEST LIMITED"-i 2016-cı ilin fevralında, 24 yaşında təsis edib.
P.S. Şəkildəki evlər 2017-18-ci illərdə "Downgate"də inşa olunub.