Son zamanlar ən çox şikayət olunan qurumlardan biri , haqqında ən çox yazılan səhiyyə obyektlərinin birincisi isə şübhəsiz ki, Fövqəladə Halların Nazirliyinin Zığda fəaliyyət göstərən məşhur modul xəstəxanasıdır.

Qeyd edək ki, Zığdakı modul xəstəxana ilə bağlı son bir-iki ayda həm şikayətlər, həm də şayiələr artıb. Şayilərdən ən qlobal miqyaslısı ötən ay bu xəstəxananın oksigen stansasiyasında baş verən qəza ilə bağlıdır. İnternet resurslarda hətta bu qəza zamanı onlarla insanın həlak olması ilə ən müxtəlif məlumatlar dolaşsa da, bu xəstəxananın bütün məsuliyyətini daşıyan FHN modul xəstəxanada qəza baş verməsini və insanların həlak olmasını təkzib etdi. Xatırladaq ki, Fövqəladə Hallar Nazirliyinin mətbuat xidmətinin rəhbəri Gülçin Mehdiyeva qafqazinfo-ya verdiyi açıqlamada yayılan məlumatların əsassız olduğunu vurğulayaraq “Xəstəxanada heç bir qəza baş verməyib”, demişdi. Daha sonra isə FHN-dən verilən rəsmi açıqlamada yayılan məlumatları əsassız adlandırmışdı.

Bu qəzadan əvvəl də modul xəstəxanada müxtəlif qəzaların baş verməsi ilə bağlı məlumatlar yayılmışdı, lakin bu şayiələrin miqyası son qəza ilə müqayisədə kiçik idi.

FHN-in COVİD-19 xəstələrinin müalicəsi üçün yaradılan modul xəstəxanasından gələn şikayətlər isə əsasən bu tibb ocağında “həyat alveri”nin ən üst səviyəyə çıxması ilə əlaqəlidir. Dünən pia.az-a müraciət edən şikayətçi isə çox ağır vəziyyətdə olan yaxının həyatının xilas edilməsi üçün həkimlərin onlardan bir iynənin vurulmasına görə 1000 manat istədiklərini və xəstəyə üç iynənin vurulması gərəkdiyini bildirib. Xəstə yaxını 3 min manatlarının olmadığını, lakin yaxınlarını ölümə tərk edə bilmədiklərini dilə gətirərək, haradan olsa, tələb olunan məbləği tapmağa çalışdıqlarını qeyd edib.

Böyük ehtimalla söhbət “Actemra” dərmanından gedir. Qeyd edək ki, bu dərmanı ağır korona xəstələrinə vururlar və dərman kritik durumda olan xəstələrin ciyərlərinin ventilyasiya olunması problemindən qurtarır və mormal nəfəs almasını təmin edir.

Əgər bu az tapılan dərman Azərbaycanda varsa, onda həmin dərmanın bir çoxlarının əlində, o cümlədən koronalı xəstələri müalicə edən həkimlərin əlində olmasını, dərmanın bir flakonunun 1000 manata satılmasını FHN necə izah edə bilər? Təbii ki, bu qurum qəza zamanı olduğu kimi belə bir şeyin olmadığını, iddianın əsassız olduğunu bildirəcək, lakin bu təkzib həyatları alver predmetinə çevrilən onlarla, bəlkə də yüzlərlə xəstənin taleyində heç nəyi dəyişməyəcək.

Xatırladaq ki, “Actemra” dərmanı qara bazarda əvvəllər 600-700 manata satılırdı. Görünür ki, dərmana olan ehtiyac qiymətin də artmasına səbəb olub. Ya da midul xəstəxanada çalışan həkimlər fürsətçi davranırlar.

Başqa bir şikayətçi isə pia.az-a bildirib ki, xəstəsini VİP palatada yerləşdirilməsi üçün ondan 11 min manat alıblar və iki gündən sonra xəstə həyatını itirib. Həmin şəxs deyir ki, sonradan öyrəndiyinə görə adətən VİP palatalarda xəstələrin yerləşdirilməsi üçün 3-4 min arası alsalar da, onu aldadaraq 11 min alıblar. Xəstəsini itirdikdən sonra şikayətçi modül xəstəxananın qapısı ağzında səs-küy salıb pulunu geri istəsə də, onu ərazidən uzaqlaşdırıblar.

Qeyd edək ki, Zığda yerləşən modül xəstəxana Fövqəladə Hallar nazirinin müavini, tibb xidməti general-leytenantı Faiq Tağızadənin kurasiyası altındadır. Modul xəstəxananın baş həkimi isə nazir müavinin yaxın qohumu olduğu bildirilir.