Bizim televiziyalar da canlı reportajlar verməlidir - TƏKLİF

29-10-2020, 13:18 66 dəfə baxılıb

"Bərdə və Gəncədə baş verən erməni terrorları zamanı mediamızın operativlikdən kənarda qaldığının şahidi olduq. Türk mediası isə həmin hadisələr zamanı birbaşa efirdə idilər".
Bu sözləri tanınmış jurnalist Elçin Şıxlı "Şərq"ə açıqlamasında bildirib. O qeyd edib ki, müharibə dönəmində baş verənlər mediamızda müəyyən qüsurların hələ də mövcud olduğunu göstərdi:

"Azərbaycan mediası dünyaya düzgün və operativ məlumat verməsə, ermənilər hər mənada bundan yararlanacaq. Bir çox media orqanlarımız həmin ərazilərdə olsalar da, nədənsə, onlara təhlükəsizlik baxımından birbaşa reportaj aparmağa icazə vermirlər. Səbəb kimi düşmən koordinatları görərək həmin ərazilərin vurulması göstərilir.

Təbii ki, bununla birmənalı şəkildə razıyam. Amma bu zaman sual yaranır ki, nə üçün türkiyəli həmkarlarımıza birbaşa reportaj aparmaq üçün icazə verilir? Bizimkilər isə çəkirlər, sonradan onu efirə verirlər. İkinci məqam isə ondan ibarətdir ki, türk həmkarlarımız çəkiliş aparanda nə üçün təhlükəli olmur, amma bizdə olur?

Yəni burada problemlər çoxdur. Bu göstərişi verənlər nəyə görə, nə üçün, hansı məqsədlə veriblər? Əgər türkiyəli jurnalistlərdə təhlükəsizlik baxımından xüsusi avadanlıqlar varsa, bəs bizdə niyə yoxdur? Bütün bunlar müzakirə olunmalıdır. İnşallah, torpaqlarımız işğaldan azad olunduqdan, Vətən müharibəsi qələbə ilə nəticələndikdən sonra bu məsələlər daim diqqətdə olacaq. İlk növbədə medianın vəziyyəti ilə bağlı xüsusi tədbirlər görülməlidir".

E.Şıxlı bildirib ki, bu gün həm də informasiya müharibəsidir:

"Bu gün informasiya müharibəsinin önündə gedən ölkə Prezidentidir. Hər gün neçə-neçə xarici mətbuata müsahibə verir, hadisələrin əsl səbəbini izah edir.

Habelə, Prezidentin köməkçisi Hikmət Hacıyevin, Müdafiə Nazirliyinin mətbuat katibi Anar Eyvazovun da çıxışılarını yüksək dəyərləndirirəm. Öz işlərinin öhdəsindən layiqincə gəlirlər.

Xüsusilə onların xarici dillərə sahib olması və xarici medianı daim məlumatlandımaqları təqdirəlayiqdir və bütün bunlar müsbət addımlardır.

Amma bu, informasiya müharibəsinin bir tərəfidir. Medianın strukturu isə tam başqadır. İnanıram ki, tezliklə medianın problemlərinin həll olunması istiqamətində müsbət addımlar atılacaq".


loading...
OXŞAR XƏBƏRLƏR
XƏBƏR LENTİ
BÜTÜN XƏBƏRLƏR