İran ABŞ ilə qarşıdan gələn danışıqlarda əldə edilən razılaşmanın reallaşmasına nail olmağa çalışacaq.

Bunu İran parlamentinin sədri, ölkənin nümayəndə heyətinə rəhbərlik etməsi gözlənilən Məhəmməd Bağır Qalibaf X hesabında yazıb.

O qeyd edib ki, Vaşinqtonun "vicdansızlığı və həddindən artıq tələbləri" halında Tehran sarsıdıcı cavab verəcək:

"Ali liderin bizə həvalə etdiyi vəzifə müqavilənin şərtlərinin yerinə yetirilməsinə çalışmaqdır. Vicdansızlıq, müqavilənin pozulması və digər tərəfdən həddindən artıq tələblər halında düşmənə sarsıdıcı cavab verməkdən çəkinməyəcəyik".

Qalibaf ABŞ-ni yenidən hərbi münaqişəyə cəhd edəcəyi təqdirdə "daha güclü zərbə" ilə hədələyib.

Qeyd edək ki, İran və ABŞ-nin iki ölkə arasında əvvəllər imzalanmış anlaşma memorandumunun həyata keçirilməsi üçün bu gün İsveçrənin Bürgenştok şəhərində danışıqlara başlaması gözlənilir.

Amerika nümayəndə heyətinə vitse-prezident Cey Di Vens, İran nümayəndə heyətinə isə Parlamentin sədri Məhəmməd Bağır Qalibaf rəhbərlik edəcək.