“Başımı divara çırpdı, qarnıma zərbələr endirdi” – Əri tərəfindən döyülən müəllimə

2-04-2020, 12:20 34 dəfə baxılıb

“Başımı divara çırpdı, qarnıma zərbələr endirdi” – Əri tərəfindən döyülən müəllimə


Toyundan 10 gün sonra əri tərəfindən işgəncələrə məruz qalan orta məktəb müəllimi Şahbaz-Zadə Lalə Rasim qızının həyat hekayəsi çox ağrılıdır.

“Yeni Sabah”ın xəbərinə görə, Cinayət Məcəlləsinin 126.1-ci (qəsdən sağlamlığa ağır xəsarət yetirmə) maddəsi ilə 6 il azadlıqdan məhrum edilən Valehov Nuru Oktay oğlu apellyasiya şikayət verib. Aprel ayının 6-da hakim Elmar Rüstəmovun sədrliyi ilə məhkəmə prosesi keçiriləcək.

Bakı Ağır Cinayətlər Məhkəməsinin hökmündə qeyd edilib ki, Nuru Valehov Lalə ilə ailə həyatı qurduqdan 10 gün sonra həyat yoldaşını döyməyə başlayıb. Dediyinə görə, 2017-ci ildə ailə həyatı qurduqdan sonra elə ilk günlərdən başlayaraq Lalə ona müxtəlif söyüşlər söyüb: "Mən 40 yaşıma qədər evlənmədim. Ailəmin təkidi ilə, nəhayət, 40 yaşımda ailə həyatı qurdum. Bu hadisə də toydan 10 gün sonra baş verib. Səbəb də məndən asılı olmayıb. Toydan sonra Lalənin mənə qarşı münasibəti dəyişdi. Mənimlə kobud danışmağa başladı. Həmin gün də elə oldu ki, söyüş söydü. Mən də özümü itirdim və əlim açıldı. Bir neçə sillə vurdum. Nə təpik, nə də yumruq vurmuşam".

İstintaq araşdırmaları zamanı məlum olub ki, Lalənin həmin zaman başı divara çırpılıb və ağır xəsarət alıb. Nuru Valehov isə bunu belə izah edib: "Bilmədim, indi də başa düşə bilmirəm. Mən onun başını divara çırpdığımı xatırlamıram. Hadisədən sonra çıxdım çölə. Bir neçə siqaret çəkəndən sonra evə qayıtdım. Özümü sakitləşdirdim, nə baş verdiyini anlaya bilmirdim. Elədiyim hərəkətdən çox peşman idim. Sonra Lalənin səhhəti pisləşdi. Onu xəstəxanaya apardım. Özəl klinikaya aparmışdım ki, yaxşı müalicə olunsun. Sonra dedilər ki, bilərəkdən dövlət xəstəxanasına aparmamısan. Guya hadisəni gizlətmək istəmişəm. Həmin ərəfədə anası, dayısı gəldi. Söhbət elədik ki, nə olubsa, mənim səhvimdir. Bütün xərci özüm çəkdim, onun yanında özüm qaldım. Bir neçə gün reanimasiyada qalandan sonra səhhəti düzəldi. Çıxıb evə qayıtdıq. Biz bu məsələni öz aramızda həll edəcəkdik. Amma onun anasının və mənim anamın dedikləri bizim münasibətləri korladı. Bir neçə aydan sonra İsmayıllıya atamın ad gününə getdik. Mən ordan qayıdandan sonra anası gəlib Laləni aparıb. Dəfələrlə Laləyə zəng elədim. Onunla danışıb, barışmaq istədim. Səhvimə görə üzr istəyib, evimizə qayıtmasını xahiş etdim. Amma anası buna imkan vermirdi. İndi də Lalə ilə danışıb söhbət edə bilmirəm".

Hakim Cavid Hüseynovun izahatından məlum olub ki, hadisənin danışılmayan gizli məqamları var. Belə ki, Nuru arvadını döydükdən sonra onu xəstəxanaya aparıb. Xəstəxanadan hadisə barədə polisə məlumat verilib. Xəstəxanaya gələn polis əməkdaşları Nuru Valehovu dindirib. Nuru həmin vaxt polisə deyib ki, arvadı ilə gəzmək üçün dama çıxıblar. Orada gəzərkən Lalə yıxılıb. Nuru polisə bildirib ki, Laləni qucağına alaraq evə gətirmək istəyib. Həmin vaxt Lalə qucağından düşüb və yenə də xəsarət alıb. Lalənin səhhəti düzələndən sonra o da eyni məzmunlu ifadə verib, polisə yıxıldığını deyib. Lakin sonradan münasibətlər korlanıb və Lalə anasının təkidi ilə şikayət edib.

Məhkəmədə ifadə verən Lalə deyib ki, ailə münasibətləri cəmi 40 gün içərisində korlanıb: "Mən ailə həyatı quranda Azərin yaşını bilmirdim. Hətta evlənəndən sonra onun adının Nuru olduğunu bildim. Bizim rəsmi nikahımız yoxdur. Mən ona söyüş söyməmişəm. Hansı gəlin 20 gün sonra söyüş söyər? Mən onun içki içdiyini bilmirdim. Toydan sonra bildim ki, içki içir. Evə gec gəlirdi, məni döyürdü. İçkili vəziyyətdə gəlib deyirdi ki, dur oynayaq. Mən bunu qəbul edə bilmirdim. O məndən 20 yaşa qədər böyükdür. Dəfələrlə mübahisəmiz oldu. Axırıncı dəfə də məni döydü. Sonra da mənə dedi ki, şikayət etmə. Mən bir müddət müalicə aldım. Heç bir səbəb olmadan mübahisə edirdi. Axırıncı dəfə də onun köynəyini divanın üstünə qoymuşdum. Dedi ki, niyə qatlamamısan? Mən də hirsləndim ki, belə mənasız söhbətə görə niyə mənə qışqırırsan? Başladı məni döyməyə. Dedim ki, başımdan vurma. Belimə, qarnıma zərbələr endirdi. İndi də belimdən müalicə alıram. Özləri də məni bir neçə dəfə həkimə aparıb. Axırda elə oldu ki, anam şikayət etməyimizi istədi. Çünki söz-söhbət, dava-dalaş bitmirdi".

Lalə Şahbaz-Zadə məhkəməyə mülki iddia verib və mülki iddiada göstərib ki, 15 min manat maddi ziyan, mənəvi ziyanın əvəzi olaraq isə 10 min manat tələb edir. Məhkəmədə məlum olub ki, Lalənin anası barışıq üçün Nuru Valehovdan 20 min manat tələb edir. Nuru Valehov isə deyib ki, həmin məbləği verməyi mümkünsüzdür: "Lalənin anası bilir ki, məndə o qədər pul yoxdur. Heç ona yaxın pul da yoxdur. Heç bir razılıqları, kredit şərtləri də yoxdur".

Məhkəmə araşdırması zamanı məlum olub ki, tərəflər ailə həyatı qurduqdan sonra alınan qızılların taleyi də naməlumdur. Nuru Valehov deyir ki, qızılları Lalənin anası aparıb və bunu etiraf edir. Amma Lalə deyir ki, qızılları onlarda deyil.


loading...
OXŞAR XƏBƏRLƏR
XƏBƏR LENTİ
BÜTÜN XƏBƏRLƏR