Amerika Birləşmiş Ştatlarının Dövlət Səyahət Departamentinin rəsmi internet səhifəsində ABŞ vətəndaşlarına Azərbaycanda "COVID-19” koronavirus infeksiyası və yüksək terror təhlükəsi riski ilə əlaqədar məlumat verilib. Onlara ciddi zərurət olmadığı təqdirdə ölkəmizə səyahət etməmələri tövsiyə olunub.

Qeyd olunan məlumat sosial media resurslarının Azərbaycan seqmentində yayılıb. Məlumatla bağlı Dövlət Təhlükəsizliyi Xidməti bəyan edib ki, Azərbaycan Respublikasının ərazisində terror təhlükəsinin olması ilə bağlı verilən bu kimi məlumatlar həqiqəti əks etdirmir və tamamilə əsassızdır.

Bildirilib ki, Prezident İlham Əliyevin rəhbərliyi ilə həyata keçirilən uğurlu hüquq mühafizə və təhlükəsizlik siyasəti nəticəsində ölkəmizdə yaradılmış dayanıqlı sabitlik və əmin-amanlıq vətəndaşlarımızın, həmçinin Azərbaycana gələn əcnəbilərin təhlükəsizlik şəraitində yaşamasına təminat verir. Hazırda ölkəmizə səyahət etmək istəyən şəxslər üçün hər hansı terror təhlükəsi riski mövcud deyildir.

Sosial Tədqiqatlar Mərkəzinin mətbuat xidmətinin rəhbəri, beynəlxalq məsələlər üzrə ekspert Əziz Əlibəyli həmin iddialarla bağlı "Sherg.az”a münasibət bildirdi:

"Bizim üçün ən həssas məqam 44 günlük Vətən müharibəsi dövrü idi. O vaxt xüsusi xidmət orqanlarının uğurlu fəaliyyəti nəticəsində bütün potensial təxribatların qarşısı alındı, ictimai asayişə zərbə dəymədi. Məhz savaş mərhələsini xatırlayaraq vəziyyətə qiymət vermək olar. Dediyim kimi, terror təhlükəsi yoxdur”.

Ə. Əlibəyli, həmçinn bildirdi ki, belə məlumatlar məqsədli şəkildə yayılır:

"ABŞ-ın region və xüsusilə ölkəmizdə terror təhlükəsi ilə bağlı yaydığı xəbərlər birbaşa Azərbaycanla Ermənistan arasındakı proseslərlə əlaqəlidir. Hətta mən bu cür xəbərlərin tirajlanmasının erməni lobbisinin sifarişi olduğundan əminəm. Beləliklə, bölgədəki sabitlik, təhlükəsizliklə bağlı süni problem yaradılır. Məqsəd isə Böyük qayıdışdan sonra xarici ölkə investisiyalarının ölkəyə daxil olmasının qarşısını almaqdır”.