"Mənim vaxtımda Robert Köçəryan adi mühəndis idi. Onunla heç vaxt tanış olmamışam”.

Bunu Reyting.az-a Azərbaycanın birinci prezidenti Ayaz Mütəllibov Ermənistandakı siyasi vəziyyəti və eks-prezident Köçəryan faktorunu qiymətləndirərkən deyib.

Birinci prezident xatırladıb ki, məhz Köçəryan və digər cinayətkarlar Dağlıq Qarabağda separatçı rejim qurmağa müvəffəq olmuşdu: "Mən deyə bilmərəm ki, Paşinyan və ya Köçəryan normal adamlardır. Köçəryan anormal işlərlə məşğul olub, ona normal demək olmaz. Bunlar əllərini günahsız insanların qanına batırmış şəxslərdir. Çox təəssüflər olsun ki, onlar, öz fəaliyyətlərində də çirkaba bulaşıblar. Köçəryan müharibə tərəfdarıdır. Bu, qəbuledilməzdir”.